Artesanía de Galicia

4-4-2012

A Consellería de Economía e Industria, que aposta por poñer en valor o produto artesán galego, apoia unha nova edición da Mostra do Encaixe de Camariñas como dinamizador do sector, constituíndo un atractivo escaparate das pezas artesanais que se están a elaborar en Galicia.

A Mostra desenvolve un importante papel no impulso da comercialización e da divulgación do sector artesán galego, ao tempo que constitúe unha canle de distribución fundamental para a marca Artesanía de Galicia. Este distintivo regulado pola Xunta estará representado tanto polos distintos obradoiros artesáns que contan con este referente de calidade e prestixio como cun stand propio na mostra, no que haberá exhibicións de artesanía en vivo.

Ademais do soporte a este encontro, o apoio da Consellería que dirixe Javier Guerra ao encaixe, que constitúe unha importante actividade económica para moitas familias, fundaméntase a través de ferramentas de promoción e fomentando a súa continuidade mediante a formación das actuais e futuras palilleiras.

Esta edición da mostra, que será inaugurada esta tarde coa participación da xerente da Fundación Centro Galego da Artesanía e do Deseño, Elena Fabeiro, conta cun amplo programa de actividades. Ademais de eventos consolidados, como os desfiles de recoñecidas firmas e de deseñadores noveis, haberá demostracións de oficios en directo como os oleiros de Buño, os tecidos en liño de AVP O Santiaguiño ou o vidro soprado de Víctor Palinha.

Como todos os anos, a Mostra acollerá expositores achegados do estranxeiro, nesta edición haberá representantes de países como Italia, Francia, Suíza, Brasil, Rusia, Portugal, Bélxica, Bulgaria, Malta, Polonia e Inglaterra, que complementarán á representación das artesás galegas presentes no evento.